Mig langar heim

Ég klára mitt nám í sumar en hef ekki í hyggju að snúa heim á leið alveg strax. Fyrir því eru nokkrar ástæður; sambýliskona mín á eftir 2 ár af sínu námi, mig langar að bæta við mig í mínu fagi, en það verður ekki í boði fyrr en haustið 2010, svo heimkoma mun frestast um óákveðin tíma.

Ég er ekki ungur, nema í anda, en ásatndið á vinnumarkaði heima á Fróni er þannig að ég tel mig ekki geta tekið áhættuna á því að flytja heim án þess að hafa loforð um vinnu. Reyndar er ástandið á vinnumarkaði hér í landi Þórhildar Skattadrottningar, ekki gott, en þó heldur skárra en heima. Vonandi mun ástandið batna með betri tíð og blóm í haga, en það er spurning hvað það tekur Íslendinga langan tíma að ná sér upp úr þessum djúpa dal sem við erum í.

Margir, en ekki allir, sem hafa lokið námi hér í Horsens á síðustu mánuðum, hafa ekki fengið neina vinnu og eru þar af leiðandi að mæla göturnar. Svo eru aðrir sem hafa verið heppnir og fengið vinnu. Ég er í þeirri stöðu að þurfa að finna vinnu í eitt ár, áður en ég get haldið áfram með námið og klárað það. Það verður svo að koma í ljós hvort manni verður eitthvað ágengt í atvinnuleit.

En hvað um það; ég verð að vera hæfilega bjartsýnn á framtíðina, annað er hreinlega hættulegt. Þó er eitt alveg víst; við munum flyja heim til Íslands um leið og við höfum lokið okkar námi og höfum einhverja von til að finna vinnu. Það er að mörgu leyti ágætt að vera hér í Danmörku, en landið mitt gamla með jöklum, fossum og fjöllum er einfaldlega lang best í heimi hér, því fær ekkert breytt.

Það skiptir landið og atvinnulífið miklu máli að þeir sem fara erlendis til náms, snúi aftur svo þekking þeirra komi að notum við uppbyggingu og þróun atvinnulífsins. Nám er einfaldlega fjárfesting til framtíðar. Það ætti að vera ráðamönnum ljóst að á erfiðum tímum, eins og núna, er besta fjárfestingin í námi, hvort sem það er iðnnám, tækni- eða háskólanám.

Lifið heil.

Steinmar

Fáir námsmenn ætla aftur heim

Verði honum að því...

Það leynist kannski sannleikskorn í þessu sem Uffe segir, en fólk með smá sómatilfinningu lætur ekki svona frá sér. Hann ætti kannski að skoða fjárglæfra í sinu heimalandi áður en hann líkir öðrum löndum við helvíti.

Danskir fjölmiðlar hafa undanfarna daga sagt frá fjárdrætti og gjaldþrotum nokkurra fyrirtækja þar sem upphæðirnar skipta milljörðum danskra króna. Kannski er hann að drepa þeim málum á dreif til að athyglin beinist ekki að dönskum glæpamönnum ?

Það eru allnokkrir danskir fjárglæframenn búnir að fara illa með annara manna peninga undanfarið, málið er bara það að blaðamenn vilja minna fjalla um eign glæpamenn en annarra. 

Frekja og hroki aðgangsorð íslenska helvítisins

Ef rétt reynist

Þetta þykir mér, ef rétt reynist, koma úr annarri átt en ætti að koma. Mér þykir nöturlegt að lesa um svona á erlendum vefmiðlum, hvort sem það er rétt eða ekki.

Hvernig er það, var ekki búið að ræða um að bæta upplýsingastreymi frá stjórnvöldum ? Hvernig væri nú að ráðamenn kæmu hreint fram við umbjóðendur sína, Íslensku þjóðina, það gæti komið í veg fyrir mótmæli, kvíða og fleira sem svona ástand skapar.

Komi til viðræðna um ESB aðild má ekki flana að neinu, heldur verður að veltu upp öllum hugsanlegum kostum og ókostum aðildar. Það er betra til lengri tíma litið að vita nákvæmlega að hverju skal ganga, betra fyrir okkur og betra fyrir aðrar aðildarþjóðir, svo ekki komi til deilna seinna meir.

Ekki taka því þannig að sé með eða á móti, heldur vil ég vita nákvæmlega að hverju verður gengið komi til aðildar. Það er eina leiðin til að mynda sér nothæfa skoðun á málinu.

 

Drög lögð að umsókn um ESB-aðild?

Virðing- Réttlæti

Kannski er rétt að minna á það, að meðal félagsmanna VR var haldin samkeppni um hvað skammstöfunin VR ætti að standa fyrir í framtíðinni. Þessi samkeppni var haldin að frumkvæði stjórnar VR.

Vinningstillagan var VIRÐING- RÉTTLÆTI.

ER þá ekki kominn tími til að stjórn VR taki það til sín og virði réttlætið og sýni félagsmönnum að þeir hafi vilja til að sýna félagsmönnum virðingu og réttlæti ?

Vilja stjórn VR burt

Að halda andlitinu

Það að halda ró sinni á erfiðum tímum er nauðsynlegt hverjum (stjórnmála) manni. Um leið og menn láta það eftir sér að hrópa og kalla í áttir missa menn trúverðugleikann og sjálfur missir maður alla yfirsýn. Það er, að mínum dómi, hið besta mál ef menn gleyma ekki kímninni, hún er mikið og gott hjálpartæki fyrir sálina. Samt sem áður er engin ástæða til að gleyma alvörunni, því öllu gamni fylgir alvara.

Svalir Íslendingar

Spara meira

Liggur þá ekki beinast við að hætta við framboð til Öryggisráðsins. Þar er hægt að spara umtalsverðar fjáhæðir. Það er ekki bara almenningur sem þarf að draga saman seglin.

Hætt við þátttöku í kosningaeftirliti

Þetta er ekkert nýtt

Því miður eru þetta ekki nýjar fréttir, svona hefur þetta gengið um langt árabil.

Það eiginlega með ólíkindum að menn geti ekki gert áætlanir sem endurspegla raunveruleikann. Það er vitað, nokkurn veginn, hvað þarf að nota skipin mikið, þ.e. hvað, marga tíma þarf að sigla svo það er ekki flókið að reikna út hvað fer í olíu. Að sjálfsögðu verður að taka með í reikninginn frávik í báðar áttir, annaðhvort er afgangur eða ekki. Ef stefnir í hallarekstur þarf að vera til varasjóður sem hægt er að fara í við þær aðstæður, án þess að þurfi að binda skipin við bryggju.

Í sambandi við þyrlurnar, er þetta einfaldlega þannig að gera verður ráð fyrir meiri skekkjumörkum en á skipunum, svo hlutirnir geti gengið upp. Ef er ekki hægt að hafa skekkjumörkin stór verður áætlunin að taka mið af mestu hugsanlegu notkun, einfalt ekki satt. Kannski verða yfirmenn LHG að gera eins menn þurftu í gamla daga, þegar var farið til bankastjóra, biðja um meira en þeir þurftu til fá það sem vantaði ? Það er einfaldlega óviðunandi að LHG sé á mörkum þess að geta staðið í skilum með leigugjaöld af þyrlunum.

Hvernig hafa ráðamenn hugsað sér að reka og borga nýtt varðskip, sem er í smíðum ? Ef við svo kaupum þyrlur ásamt og með Norðmönnum, hvernig á að reka þær ? Á virkilega að skjóta þeim útreikningum á frest ? kannski þarf ekki að reikna það fyrr en á árunum 2012-2015 ? Í svona rekstri er ekki hægt að hugsa sem svo; þetta reddast. Annaðhvort er að hafa þennan rekstur eins og hjá mönnum eða sleppa því.

Við vitum mæta vel að það kostar peninga að halda úti gæslu og björgunarþjónustu og það gengur ekki að stinga höfðinu í sandinn og stoppa faratæki LHG á hverju hausti, af því að peningarnir eru að verða búnir.

Fyrir sjómenn og aðra þá sem hugsanlega þurfa á þjónustu LHG að halda er núverandi staða, með öllu óásættanleg. Vonandi vakna ráðamenn upp af þessum svefni sem hefur verið allt of langur og fastur.

Erfitt að halda í þyrlurnar

Sælir landar

Ég hef verið afspyrnu latur við að blogga, hef eiginlega aldrei komist almennilega í gang. Bloggið stofnaði ég snemma sumars vegna þess að mér fannst ég hafa eitthvað til málnna að leggja.

Þannig er mál með vexti að ég hef verið duglegur að lesa blogg, óháð því hverjir skrifa, og stundum hefur mig langað til að taka þátt í umræðunni, en það sem hefur haldið afturaf mér er eitthvað, sem ég veit ekki alveg hvað skal kalla. Það lýsir sér þannig að þegar margir eru búnir að skrifa um einhver mál, finnst mér eins og mitt innlegg myndi drukna í flóðinu og ég sé ekki alveg tilganginn í að vera skrifa eitthvað sem hverfur inn í fjöldann og enginn les.

Sumar bloggsíðurnar eru mjög skemmtilegar, aðrar ekki. Mín er sjálfsagt ekki talin spennandi, en ætti ég að hafa áhyggjur af því ? Ég held ekki, að minnsta kosti hef ég ekki stórar áhyggjur af því.

 Það virðist vefjast fyrir mörgum bloggurum að vanda mál sitt og skrif og það verður að segjast eins og er að, þegar ég les færslur sem eru fullar haturs eða fordóma, finnst mér fólk vera að niðurlægja sjálft sig og þar með gera sig ómarktækt, svo ég tali nú ekki um þegar fólk dæmir aðra einstaklinga vegna orðspors sem það hefur heyrt út í bæ, eða vegna fortíðar fólks, það finnst mér ekki vera manndómur.

Jæja, ég hef þetta ekki lengra að sinni, en það sjá þeir sem nenna að lesa alla leið.

Gott mál fyrir Skagfirðinga

Svona verksmiðja getur skilað góðum arði til sveitarfélagsins þar sem mikil eftirspurn er eftir koltrefjaþræði um allan heim og framleiðendur koltrefja hafa varla undan. Minni notendur koltrefja hafa verið í vandræðum með að fá keypt efni, auk þess sem verðið er hátt. Stórnotendur gleypa nánast allt efni sem er í boði og þar með kominn fótur fyrir verðhækkunum.

Svo er annar möguleiki í stöðunni; hann er að framleiða basalttrefjar, þær eru mjög sterkar, hitaþolnar, eru 2 sinnum sterkari en glertrefjar og markaður fyrir þær er vaxandi og framleiðsluferlið fyrir þær ekki ósvipað og koltrefja, þó ekki eins. Framleiðsla basalttrefja krefst heldur meiri orku og er tímafrekari, en kosturinn er sá hráefnið er til staðar, það þarf ekki að flytja það inn.

 

Styttist í ákvörðun um byggingu koltrefjaverksmiðju

Athyglisvert

Þetta er athyglisverð frétt, helst þó fyrir það að samkvæmt fréttinni flýgur þessi vél bara á nóttunni, því hún er í hleðslu yfir daginn.

En að öllu gamni slepptu er framleiðandinn að reyna að freista bandarískra varnarmálayfirvalda, með léttri, hljóðlausri flugvél sem er kjörin til eftirlits- (njósna) flugs og að auki er umhverfisvæn að því leyti að notkun hennar er ekki mengandi, þó smíðin sé það aftur á móti.

Samfellt í rúmar 83 stundir á lofti